સુરેન્દ્રનગર રેન્જના નાયબ પોલીસ મહાનિરીક્ષક ડૉ. ગિરીશ પંડ્યા (IPS) ના માર્ગદર્શન હેઠળ, LCB ના પોલીસ ઇન્સ્પેક્ટર શ્રી જે.જે. જાડેજા, પો.સબ. ઇન્સ્પેક્ટર જે.વાય. પઠાણ અને પો.સબ. ઇન્સ્પેક્ટર આર.એચ. ઝાલાની ટીમે આ સફળ કામગીરી કરી હતી. ગુપ્ત માહિતીના આધારે, પોલીસે દેવસર ગામમાં ચાંમુડા માતાના મઢ પાસે ખુલ્લામાં ચાલતા જુગાર પર દરોડો પાડ્યો હતો.
આ કાર્યવાહી દરમિયાન, પોલીસે જુગાર રમતા 7 ઈસમોને ઝડપી પાડ્યા હતા. ઝડપાયેલા આરોપીઓમાં કાનજીભાઈ મોતીભાઈ મુલાણી (રહે. દેવસર), અરવિંદભાઈ રમેશભાઈ સુરેલા (રહે. પાજવાડી), સહદેવસિંહ અનોપસિંહ ચૌહાણ (રહે. ડોળીયા), મુકેશભાઈ ધુધાભાઈ ડાભી (રહે. દેવસર), પરષોતમભાઈ મોહનભાઈ ઓળકીયા (રહે. ધરમપુર), ગોરધનભાઈ રામશીભાઈ મજેઠીયા (રહે. મેવાસા) અને જયસુખભાઈ રાયમલભાઈ ઉઘરેજા (રહે. દેવસર) નો સમાવેશ થાય છે. આ ઉપરાંત, એક મહિલા આરોપીને નોટિસ આપી હાજર રહેવા જણાવાયું છે. જ્યારે સંજયભાઈ ભૂપતભાઈ સોલંકી નામનો એક આરોપી ઘટનાસ્થળેથી ફરાર થઈ ગયો હતો.
પોલીસે ઘટનાસ્થળેથી રૂ.91,900 રોકડા, રૂ.55,000 ની કિંમતના 8 મોબાઈલ ફોન અને 52 ગંજી પાના જપ્ત કર્યા હતા. પોલીસે તમામ આરોપીઓ વિરુદ્ધ ચોટીલા પોલીસ સ્ટેશનમાં જુગારધારા હેઠળ ગુનો નોંધી વધુ કાર્યવાહી હાથ ધરી છે. આ દરોડામાં LCB ના પો.હેડ કોન્સ. પ્રવીણભાઈ કોલા, પો.કોન્સ. કુલદીપભાઈ બોરીયા, પો.કોન્સ. કૃણાલસિંહ ઝાલા અને પો.કોન્સ. વજાભાઈ સાનીયા સહિતના સ્ટાફે મહત્વની ભૂમિકા ભજવી હતી. આ સફળ કામગીરીથી સુરેન્દ્રનગર જિલ્લામાં જુગારની બદીને નાબૂદ કરવા માટે પોલીસની પ્રતિબદ્ધતા ફરી એકવાર સાબિત થઈ છે.
