શાળાના આચાર્ય શ્રી કિશોરભાઈ મકવાણાના માર્ગદર્શન હેઠળ આ કાર્યક્રમની શરૂઆત કરવામાં આવી હતી. આ પ્રસંગે શિક્ષકો વિમલભાઈ ખાંભલા, શ્રીમતી રિંકુબેન ચાવડા અને શ્રીમતી પારૂલબેન પટેલે પણ સક્રિય સહભાગ આપીને કાર્યક્રમને સફળ બનાવ્યો હતો.
કાર્યક્રમ દરમિયાન, વિદ્યાર્થીઓએ શાળા પ્રત્યે પોતાનું સમર્પણ દર્શાવતા એક ખાસ શપથ લીધા હતા. આ શપથમાં તેઓએ શાળાની સ્વચ્છતા જાળવવી, શિક્ષણ પ્રત્યે સજાગ રહેવું, શાળાની તમામ પ્રવૃત્તિઓમાં સક્રિય ભાગ લેવો અને શાળાનું ગૌરવ વધારવું જેવા મહત્વપૂર્ણ સંકલ્પો લીધા હતા.
શપથગ્રહણ બાદ, “મારી શાળા – મારું ગૌરવ”, “મારું સ્વાભિમાન”, “શાળાની સ્વચ્છતા” અને “શાળા પ્રત્યે વિશ્વાસ” જેવા વિષયો પર શિક્ષકો અને વિદ્યાર્થીઓ વચ્ચે જીવંત ચર્ચા યોજવામાં આવી હતી. આ ચર્ચા દ્વારા વિદ્યાર્થીઓને શાળાની પરંપરાઓ, મૂલ્યો અને કૃતજ્ઞતાનું મહત્વ સમજાવવામાં આવ્યું હતું. આ પ્રકારના કાર્યક્રમો શાળાની પ્રવૃત્તિઓમાં નવી ઉર્જાનો સંચાર કરે છે અને વિદ્યાર્થીઓને તેમના શૈક્ષણિક વાતાવરણ પ્રત્યે વધુ જવાબદાર બનાવે છે.
