સુરેન્દ્રનગર જિલ્લામાં ચોમાસા દરમિયાન મુખ્ય માર્ગોની બંને બાજુએ ઊગી નીકળેલા બાવળો, વનસ્પતિ અને ઝાડી-ઝાંખરાંને દૂર કરવાની કામગીરી શરૂ કરવામાં આવી છે. આ નડતરરૂપ વનસ્પતિને કારણે વાહનચાલકોને માર્ગ પર અવરજવર કરવામાં પડતી હાલાકીને ધ્યાનમાં રાખીને આ કાર્યવાહી હાથ ધરવામાં આવી છે.
જિલ્લા કલેકટર શ્રી રાજેન્દ્રકુમાર પટેલના માર્ગદર્શન હેઠળ માર્ગ અને મકાન વિભાગ દ્વારા આ કામગીરી જેસીબીની મદદથી કરવામાં આવી રહી છે. આ ઝુંબેશ અંતર્ગત સુદામડા-નાગડકા રોડ અને પાટડી-દસાડા રોડની બંને બાજુએ ઊગી નીકળેલા બાવળોને દૂર કરીને માર્ગોને વાહનવ્યવહાર માટે વધુ સુરક્ષિત અને સુગમ બનાવવામાં આવ્યા છે. આ કામગીરીથી વાહનચાલકોને થતી અસુવિધામાં ઘટાડો થશે.
