આ પહેલથી જુદા જુદા વિભાગોમાં થયેલી ફરિયાદોનું ઝડપી નિવારણ શક્ય બન્યું છે. આરોગ્ય વિભાગમાં મેલેરિયા, ડેન્ગ્યુ અને ચિકનગુનિયા સંબંધી 28માંથી 26 ફરિયાદોનો ઉકેલ લાવવામાં આવ્યો છે. તેવી જ રીતે, ઇલેક્ટ્રિકલ ઇજનેરી વિભાગે સ્ટ્રીટ લાઇટ સંબંધી 377માંથી 202 ફરિયાદોનું નિવારણ કર્યું છે. આ ઉપરાંત, સેનિટેશન વિભાગે સફાઈ સંબંધી 185માંથી 156 અને ખુલ્લી/ભૂગર્ભ ગટર સફાઈ સંબંધી 219માંથી 131 ફરિયાદોનો નિકાલ કર્યો છે. આ એપ્લિકેશને પાણી, રસ્તા, ગટર, અને અન્ય નાગરિક સુવિધાઓ સંબંધિત ફરિયાદોના નિવારણમાં પણ નોંધપાત્ર ભૂમિકા ભજવી છે. પીવાલાયક પાણી સંબંધી 76માંથી 36, ભૂગર્ભ ગટર સંબંધી 150માંથી 86, અને રોડ-રસ્તા સંબંધી 168માંથી 115 ફરિયાદોનો ઉકેલ લાવવામાં આવ્યો છે.
મહાનગરપાલિકાએ રખડતા ઢોર અંકુશ, બાગ-બગીચા, અને ટાઉન પ્લાનિંગ જેવી અન્ય સમસ્યાઓનું પણ એપ્લિકેશન દ્વારા નિવારણ કર્યું છે. રખડતા ઢોર સંબંધી 27માંથી 22, અને જર્જરિત બાંધકામ સંબંધી 12માંથી 6 ફરિયાદોનો નિકાલ થયો છે. સિટી બસ અને ટ્રાન્સપોર્ટ સંબંધી 2માંથી 1 ફરિયાદનું નિવારણ થયું છે અને બીજી એક પ્રક્રિયા હેઠળ છે. જાહેર શૌચાલય સંબંધિત 4 ફરિયાદોનો પણ સંપૂર્ણ નિકાલ કરી દેવામાં આવ્યો છે.
મહાનગરપાલિકાએ નાગરિકોને આ એપ્લિકેશનનો વધુ ઉપયોગ કરવા અપીલ કરી છે. જેથી ફરિયાદ નિવારણ પ્રક્રિયા વધુ સરળ, પારદર્શક અને ઝડપી બનાવી શકાય. આ સફળતા દર્શાવે છે કે ટેકનોલોજીનો ઉપયોગ નાગરિકોની સુવિધા માટે કેટલો અસરકારક સાબિત થઈ શકે છે.
