ફરિયાદી જાગૃત નાગરિક હોમગાર્ડ તરીકે તેમજ જિલ્લા હોમગાર્ડઝ કચેરીમાં આઉટસોર્સથી સરકારી વાહનના ડ્રાઈવર તરીકે ફરજ બજાવે છે. ગત અંબાજી મેળા દરમિયાન ફરિયાદીએ ડબલ શિફ્ટમાં ડ્રાઈવર તરીકે સેવાઓ આપી હતી. આ કામગીરીના બદલામાં તેમને ૩,૧૭૮ જેટલું માનદ વેતન મળવાપાત્ર હતું.
આ વેતન પોતે મંજૂર કરાવી આપ્યું હોવાનો દાવો કરી આરોપી હેડ ક્લાર્ક વિજયભાઈ પરમારે ફરિયાદી પાસેથી તેમાંથી ૩,૦૦૦ની લાંચ માંગી હતી. જોકે, ફરિયાદી પોતાની મહેનતના નાણાંમાંથી લાંચ આપવા માંગતા ન હોવાથી તેમણે તુરંત રાજકોટ એસીબીનો સંપર્ક સાધ્યો હતો.
આથી ફરિયાદના આધારે એસીબી સુરેન્દ્રનગરના પી.આઈ. એમ.ડી.પટેલ અને તેમની ટીમ દ્વારા તા. ૧૯/૧૨/૨૦૨૫ના રોજ જિલ્લા હોમગાર્ડઝ કચેરીમાં જ છટકું ગોઠવવામાં આવ્યું હતું. ટ્રેપ દરમિયાન જેવી લાંચની લેવડદેવડ થઈ કે તુરંત એસીબીની ટીમે વિજય પરમારને દબોચી લીધો હતો. રાજકોટ એકમના મદદનીશ નિયામક કે.એચ.ગોહિલના માર્ગદર્શન હેઠળ આ સમગ્ર કામગીરી પાર પાડવામાં આવી છે અને આરોપી વિરૂધ્ધ ભ્રષ્ટાચાર નિવારણ અધિનિયમ હેઠળ ગુનો નોંધી આગળની તપાસ હાથ ધરવામાં આવી છે.
